WANANCHI MERU WATOLEWA HOFU JUU YA MLIPUKO WA UGONJWA WA KIPINDUPINDU.

09 April 2019

Afisa Afya wa Halmashauri ya Wilaya ya Meru,Ndg Amani Mlay ametoa wito kwa Wananchi wa Halmashauri hiyo kuondokana na hofu ya mlipuko wa  Ugonjwa wa kipindupindu badala yake wachukue tahadhari ya magonjwa ya mlipuko.

Akizungumza Ofisini kwake ,Mlay amedhibitisha kutokuwepo kwa ugonjwa wa  kipindupindu kwenye Halmashauri hiyo, na kueleza kuwa ,Mwanakijiji wa kijiji cha Mowara Kata ya Maruvango katika Halmashauri hiyo aliyehisiwa kuwa  na dalili za kipindupindu wakati wa matibabu Wilayani Siha ambaye vipimo vilipelekwa Hospitali ya Mkoa wa Kilimanjaro Mawenzi  amebainika kutokuwa na ugonjwa huo.

Aidha Mlay amewataka wananchi hao kuzingatia maswala ya usafi ili kuepukana na magonjwa ya mlipuko ikiwemo kipindupindu.

Mlay ameeleza kuwa Halmashauri imekuwa ikitoa elimu ya Afya, kuhusiana na ujenzi na matumizi bora ya vyoo, kunawa mikono baada ya kutoka chooni na kabla ya kula, kuchemsha maji ya kunywa ,kula vyakula vya moto , kuosha matunda kabla ya kula pamoja na kuweka safi  mazingira yanayowazunguka kwa kutokutupa taka ovyo.