Jamii yatakiwa kuzingatia elimu ya afya ili kudhibiti magonjwa yasiyoambukiza .

Imewekwa: November 14th, 2019

Mkurugenzi mtendaji wa Halmashauri ya Wilaya ya Meru Ndg.Emmanuel Mkongo ametoa Wito kwa wananchi wa Halmashauri hiyo kuzingatia elimu na ushauri toka kwa wataalam wa afya ili kuwa na afya bora wakati wote.         

Mkongo amesema hayo katika maadhimi sho ya  wiki ya kudhibiti na kupambana na magonjwa yasiyoambukiza ambayo kwa Halmashauri hiyo  yamefanyika katika Kata ya Mbuguni na kitaifa yamefanyikia Mkoani Dodoma.  

Mkongo Amesema  kwa miaka ya hivi karibuni vifo vingi vimetokana na magonjwa yasiyo ambukizwa hali inayopelekea Serikali kuanza kampeni  hiyo ya kuyathibiti.    

Katika kuhakikisha wagonjwa wanapata matibabu  kwa wakati Mkongo amewaagiza waganga wafawidhi wa vituo vya  afya katika Halmashauri hiyo kutenga siku moja katika Juma ya kliniki ya magonjwa ya Sukari na shinikizo la juu la damu kwani  ni taarifa zinaonesha zaidi ya wagonjwa 5000 waligundulika kuwa na maradhi hayo kwa mwaka 2018.                                           

Naye Mganga Mkuu wa Halmashauri hiyo Dkt. Maneno Focus amesema  miongoni mwa visababishi vya magonjwa yasiyoambukizwa ni pamoja  na lishe isiyofaa, kutofanya mazoezi,unywaji wa pombe kupita kiasi,uvutaji wa sigara na matumizi ya tumbaku,na sababu nyinginezo za kurithi.

Drk.Focus alifafanua kuwa Mpango wa Kuzuia magonjwa yasioambukizwa umelenga kuelimisha na kuihusisha jamii,kuwapa mafunzo watoa huduma na kuongeza vifaa tiba na dawa katika ngazi zote za kutolea huduma.Katika Zoezi la wiki ya udhibiti wa Magonjwa yasiyoambukiza halmashauri ya Meru iliwaalika madaktari bingwa wa magonjwa ya Ndani na upasuaji ambao walitoa ushauri na tiba kwa wananchi zaidi ya 798 kutoka kata za pembezoni zikiwemo Leguruki,Ngarenanyuki na Mbuguni.

Mkurugenzi Mtendaji wa Halmashauri ya Meru akizungumza na wananchi wa Mbuguni ,Kulia kwake ni Afisa Tarafa wa Tarafa ya Mbuguni Ndg.Abdallah Temi na kushoto ni Mganga Mkuu Wilaya Dkt.Focus Maneno.

Wananchi wa Kata ya Mbuguni wakati wa uzinduzi wa wiki ya kudhibiti na kupambana na magonjwa yasiyoambukizwa.

 zoezi la upimaji Kata ya Leguruki