DC KAGANDA ATOA MAELEKEZO KWA MAAFISA UGANI KUWASILISHA TAARIFA KILA MWEZI.

Imewekwa: August 29th, 2024

Na. Annamaria Makweba

Mkuu wa Wilaya ya Arumeru Mhe. Emmanuela Kaganda amewataka Maafisa Ugani kuwa na Madaftari  yanayoonyesha kazi wanazozifanya katika kila Kata na Vijiji.

Mhe. Kaganda ametoa maelekezo hayo leo tarehe 29 Agosti, 2024 katika hafla fupi ya kugawa vitendea kazi kwa Maafisa Ugani  wa Kata zote 26 za Halmashauri ya Wilaya ya Meru.

"Kila ifikapo mwisho wa mwezi nataka nipate taarifa ya kazi mnazozifanya kwa kila Afisa Ugani. Kila Afisa Ugani awe na Daftari linaloonyesha ameenda Kata au Kijiji gani, amekutana na nani, na huduma gani ameitoa kwa mwananchi huyo" Amesema Kaganda.

Katika zoezi la ugawaji wa vitendea kazi hivyo, Mkuu wa Seksheni ya Kilimo Bi. Digna Massawe ameeleza kuwa mnamo tarehe 10 Agosti 2024, katika Mkutano uliofanyika Ikulu Jijini Dar es Salaam Mhe. Rais wa  Jamhuri ya Muungano wa Tanzania Dkt. Samia Suluhu Hassan aligawa Vitendea kazi kwa Maafisa Ugani wote nchini na Halmashauri ya Meru imepatiwa Vishikwambi 34 na Magwanda 31 kwa ajili ya kutoa huduma kwa wakulima.

Bi. Massawe ameeleza kuwa lengo la vitendea kazi hivyo ni kwa ajili ya kuboresha huduma za ugani na kuongeza tija ya uzalishaji kwa wakulima wadogo na kuinua kipato chao.

Pia, ameeleza wameandaa mfumo maalum utakaotumika kwenye Vishkwambi ambao  utawasaidia Maafisa Ugani kupiga picha na kuandaa taarifa za huduma wanazotoa,  mahali na muda wa huduma hizo kutolewa.  Hii itasaidia katika kufuatilia maendeleo ya kilimo na kuongeza uzalishaji kwa kutumia teknolojia.

Katika Hatua nyingine Mwenyekiti  wa Halmashauri ya Wilaya ya Meru Mhe. Jeremia Kishili amewataka Maafisa Ugani hao kwenda kufanya kazi kwa ushirikiano kati ya Wataalam wa Kilimo na Mifugo hasa katika matumizi ya vitendea kazi vinavyotolewa na Serikali ili kuleta ufanisi kwa kazi zao.

Afisa Ugani wa Kata ya Seela Sing'isi, Ndg. Spora Mtari, ametoa shukrani kwa Mhe. Rais Dkt. Samia kwa kuona umuhimu wa kuwapa vitendea kazi maafisa ugani ili waweze kufanya kazi kwa weledi na kufikia matarajio ya viongozi na wananchi. Ameahidi kuwafikia wakulima na kuwasaidia kuongeza uzalishaji na utunzaji wa chakula.

Hata hivyo, Mkurugenzi Mtendaji Halmashauri ya Wilaya ya Meru Mwl. Zainabu J. Makwinya ametoa Shukrani kwa Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kuendelea kuiangalia Sekta ya Kilimo, Mifumo na Uvuvi . Aidha alikumbusha kuwa mbali na kupokea vifaa hivyo mwaka 2023 Halmashauri ya Wilaya ya Meru ilipokea Pikipiki 29 za maafisa ugani ili kutekeleza majukumu yao.

fungua hapa kupata video,☝️