NDG,JOHN D. PALLANGYO APITA BILA KUPINGWA UCHAGUZI MDOGO WA UBUNGE JIMBO LA ARUMERU MASHARIKI.

Imewekwa: April 19th, 2019

Mgombea Ubunge kupitia chama cha Mapinduzi, (C.C.M) Ndg.John Pallango atangazwa rasmi  kupita bila kupingwa katika uchaguzi mdogo wa ubunge Jimbo la Arumeru Mashariki.

Akitoa taarifa kwa vyombo vya habari, msimamizi wa uchaguzi  mdogo  jimbo la Arumeru Mashariki ambaye pia ni Mkurugenzi wa  Halmashauri ya Meru Ndg. Emmanuel Mkongo amemtangaza John D. Pallangyo  kupita bila kupingwa kwenye Uchaguzi mdogo wa Ubunge jimboni humo.

Mkongo amesema kuwa  toka  zoezi la kuchukua fomu lianze tarehe April 15 Aprili mwaka 2019, jumla ya  wagombea 11 walijitokeza kuchukua fomu lakini hadi kufikia 10:00 jioni ya leo wagombea watatu ambao ni Antonia Ndosi (DP),George Nashoni (CUF) Msifuni Mwaja (TL)  walishindwa kurudishwa fomu.

Aidha Mkongo ameeleza kuwa wagombea wengine saba ambao ni Mohamed Kitundu (SAU),Juma Ntajera  (ADA- TADEA), Tulisabya Lwitakubi (UNDP),Mgina Mustafa (AAFP) Rashid Mkama (NRA),Cosmas Kavishe(NCCR) Mageuzi, Saimon Ngilisho(Demokrasia Makini) wa vyama vya upinzani walirejesha fomu lakini wakati wa ukaguzi  NEC ilibaini fomu zao kuwa na dosari mbalimbali zilizosababisha kuenguliwa kwenye mchakato huo.

 Akizungumza mara baada ya kutangazwa kupita bila kupingwa Ndg.John Pallangyo ameishukuru NEC kwa kufanya kazi yake kwa uadilifu pamoja na mwenyekiti wa CCM taifa Rais John Magufuli kwa kupitisha jina lake kwenye kikao cha kamati kuu ya CCM ili apeperushe bendera ya CCM.

Aidha Pallangyo amewahidi wananchi wa jimbo la Arumeru Mashariki  kuwa atashirikiana nao kutatua kero walizo nazo mara baada ya kuapishwa.

Aidha wagombea saba ambao hawakukidhi vigezo  vya NEC,wamekiri kuridhika na matokeo ya uteuzi  wa Ndg. John Pallangyo na kuahidi kumpa ushirikiano  wa kutosha. 

Naye mshili mkuu wa viongozi wa mila na tamaduni za  Meru Ezron Summary alimuomba Mbunge huyo mteule kushirikina na wananchi wa Meru na kuwaletea maendeleo.

Ikumbukwe kuwa zoezi la urejeshaji fomu za kugombea ubunge  Jimbo la Arumeru Mashariki  lilianza tarehe 15 Aprili 2019 na kuhitimishwa leo Tarehe 19 Aprili 2019 saa 10:00 kamili jioni.